कन्फेसन‌‌‌ - शब्दहरु

मै‍ले शब्दहरुको बरदान पाएकोछु

मस्तिष्कका डालाभरी शब्दका बिऊहरु छन्

र बाह्रै मास उजाड खेतभरी शब्दहरु छरेर

शब्दै शब्दहरुको खेती गर्छु

म शब्दहरुको बाली काट्छु

म शब्दहरुको खसी पाल्छु

अनि शब्द-भोज बोलाएर

शब्दैशब्दको मासु-भात पकाएर

आफ्नो भोक मेट्छु र

शब्दभोगीहरुलाई तृप्त पार्छु

मैले लेखेका शब्दहरु

शेक्सपिएरका सबै नाटकमा भन्दा बढि होलान

मैले बोलेका शब्दहरु

मण्डेलाका सबै भाषणमा भन्दा बढि होलान

शब्दहरुमा म बुद्धभन्दा शान्तिप्रिय छु

चे ग्वेभारा भन्दा क्रान्तिप्रिय छु

शब्द चढेका बेला म जो’नी बन्दिन्छु

शब्द लागेका बेला म जे’नी गर्दिन्छु

शब्दहरुले मैले प‍माणपत्र पाएँ

प्रसंशक/आलोचक र प्रेमिका पनि पाएँ

शब्द मेरो बाँसुरी हो र यसैलाई बजाएर

मैले आफ्नो भजन गाएँ र जगलाई सुनाएँ

***********************************

फर्केर हेर्छु - आफूले तय गरेको शब्दको दूरी

धेरै दूर छ, अनि आँफैलाई हेर्छु

म जहाँको तहिं छु

स्थिर छु र अहिले एक्लो छु

मेरा शब्दले होमरको ‘ओडिसी’ लेखिएन

मेरा शब्दले लिंकनको ‘डिमक्रेसी’ देखिएन

मेरा शब्दले श्रीमतीको आकांक्षा मेटिएन

मेरा शब्दले जिन्दगीको भाका भेटिएन

न त कसैको आलो घाउमा मल्हम दल्यो

न त कसैको चिसो चुल्होमा आगो बल्यो

न रुन्चे ओंठमा हाँसो छर्न सक्यो शब्दले

न फुस्रे कोटमा बिटो भर्न सक्यो शब्दले

मसंग कर्मको खेती गर्ने जाँगर थिएन

खुशी बाँड्ने र हाँसो साट्ने अवसर थिएन

त्यसैले शब्दहरुसंग रौसिंदै र रत्तिंदै गर्दा

सिर्जनशिल वयले कोल्टे फेर्नै लागेछ

फगत रित्ता शब्दहरुको यही पोको छाडेर